കാർഷികം - പപ്പായ

പപ്പായ അത്ര നിസ്സാരക്കാരനല്ല! പറമ്പുകളിൽ ധാരാളമായി കാണപ്പെടുന്ന പപ്പായയുടെ ആരോഗ്യ ഗുണങ്ങൾ പലരും വേണ്ട വിധത്തിൽ പ്രയോജനപ്പെടുത്താറില്ല. അറിയാം പപ്പായ എങ്ങനെ രോഗങ്ങളെ ചെറുക്കാൻ സഹായിക്കുന്നു എന്ന്.

ഓമയ്ക്ക, കപ്ലങ്ങ, പാപ്പയ്ക്ക എന്ന് തുടങ്ങി വിവിധ പേരുകളിൽ അറിയപ്പെടുന്ന പപ്പായയുടെ ആരോഗ്യ ഗുണങ്ങൾ പറഞ്ഞാൽ തീരില്ല. നമ്മുടെ പറമ്പുകളിൽ സുലഭമായി കാണപ്പെടുന്ന പപ്പായ കീടനാശിനികളുടെ സഹായമില്ലാതെ വളരുന്നതിനാൽ പേടിക്കാതെ കഴിക്കുകയും ചെയ്യാം. കിട്ടുമ്പോഴൊക്കെ കഴിക്കുന്ന പഴവർഗ്ഗം എന്നതിലപ്പുറം പപ്പായയുടെ ഗുണങ്ങൾ പലർക്കും ഇന്നും അറിയില്ല.

എല്ലാ സീസണുകളിലും ലഭ്യമാകുന്ന പപ്പായ വിറ്റാമിനുകൾ, നാരുകൾ, മറ്റ് ധാതുക്കൾ തുടങ്ങിയവയാൽ സമ്പുഷ്ടമാണ്. സൗന്ദര്യ സംരക്ഷണത്തിൽ പപ്പായ വഹിക്കുന്ന പങ്ക് ചെറുതൊന്നുമല്ല. മുഖസൗന്ദര്യത്തിനും നിറം വർദ്ധിപ്പിക്കാനും പലരും പഴുത്ത പപ്പായ ഉപയോഗിക്കാറുണ്ട്. ബ്യൂട്ടി പാർലറുകളിൽ പപ്പായ ഉപയോഗിച്ച് മുഖം മസാജ് ചെയ്യുന്നത് കാണാറില്ലേ?

പറമ്പുകളിൽ ധാരാളമായി കാണപ്പെടുന്നത് കൊണ്ട് തന്നെ ഈ പഴത്തിന് വേണ്ടത്ര പരിഗണന ആരും കൊടുക്കാറില്ല. എന്നാൽ പപ്പായയുടെ ആരോഗ്യ ഗുണങ്ങൾ കൃത്യമായി മനസ്സിലാക്കിയാൽ പപ്പായയെ പിന്നെ ഒരിക്കലും നിസ്സാരവൽക്കരിക്കുകയില്ല എന്ന് മാത്രമല്ല, പപ്പായ കഴിക്കുന്നത് നിത്യജീവിതത്തിന്റെ ഭാഗമാക്കുകയും ചെയ്യും.

പപ്പായയുടെ ആരോഗ്യ ഗുണങ്ങൾ

പഴുത്ത പപ്പായ മാത്രമല്ല, പപ്പായയുടെ ഇലയും കുരുവും പച്ച പപ്പായയും എന്തിന് പപ്പായയുടെ വേര് പോലും ആരോഗ്യഗുണങ്ങളാൽ സമ്പന്നമാണ്. ശാരീരികാവയവങ്ങളുടെ കാര്യക്ഷമമായ പ്രവർത്തനത്തിന് സഹായിക്കുന്ന വിറ്റാമിനുകളും മിനറലുകളും ധാരാളമടങ്ങിയ പ്രകൃതിദത്തമായ കലവറയാണ് പപ്പായ എന്ന് തർക്കമില്ലാതെ പറയാം. ആന്തരീകാവയവങ്ങളുടെ പ്രവർത്തനത്തെ സഹായിക്കുന്ന ഒട്ടേറെ ഘടകങ്ങൾ പപ്പായയിൽ അടങ്ങിയിരിക്കുന്നു.

വിവിധ ത്വക് രോഗങ്ങൾ മുതൽ ബ്രെസ്റ്റ് ക്യാൻസർ, പാൻക്രിയാസ് ക്യാൻസർ തുടങ്ങിയ രോഗങ്ങളെ പ്രതിരോധിക്കാൻ പപ്പായയ്ക്ക് കഴിയുമെന്ന് നേരത്തെ തന്നെ ഗവേഷകർ തെളിയിച്ചിട്ടുള്ളതാണ്. വിറ്റാമിന്‍ Aയും വിറ്റാമിന്‍ Cയും ഉൾപ്പടെ പോളിസാക്കറൈഡുകൾ, എന്‍സൈമുകൾ, പ്രോട്ടീൻ, ധാതുലവണങ്ങൾ എന്നിവ പപ്പായയിൽ ധാരാളം അടങ്ങിയിരിക്കുന്നു. കൂടാതെ പപ്പായയിൽ അടങ്ങിയിരിക്കുന്ന കരോട്ടിന്‍, ബീറ്റാ കരോട്ടിന്‍ തുടങ്ങിയവ ക്യാൻസറിനെ ചെറുക്കാനും സഹായിക്കുന്നു. പോഷകമൂല്യങ്ങൾ ധാരാളമുണ്ടെങ്കിലും പപ്പായയിൽ കാലറി കുറവാണ്.

ആരോഗ്യം വർധിപ്പിക്കാൻ പഴുത്ത പപ്പായയും പച്ച പപ്പായയും ഉപയോഗിക്കാം. രണ്ടിനും അതിന്റേതായ ഗുണങ്ങളുണ്ട്.

അമിതവണ്ണം തടയാൻ

പപ്പായയിൽ അടങ്ങിയിരിക്കുന്ന വിവിധ എൻസൈമുകൾ ദഹനപ്രക്രിയയെ സഹായിക്കും. ഇതിൽ അടങ്ങിയിരിക്കുന്ന പപ്പെയ്ൻ എൻസൈം പ്രോട്ടീനുകൾ വിഘടിപ്പിക്കുന്നതോടൊപ്പം ദഹനപ്രക്രിയയിലെ തടസ്സങ്ങൾ മാറ്റി ദഹനം വളരെ സുഗമമാക്കാൻ സഹായിക്കുന്നു. അതായത് ശരീരത്തിലെ പ്രോട്ടീൻ കൊഴുപ്പായി അടിയുന്നത് തടയുകയും പ്രമേഹം, രക്തസമ്മർദ്ദം, ആർത്രൈറ്റിസ് തുടങ്ങിയ രോഗങ്ങളിൽ നിന്ന് ശരീരത്തെ സംരക്ഷിക്കുകയും ചെയ്യുന്നു.

സ്ഥിരമായി പഴുത്ത പപ്പായ കഴിക്കുന്നവരിൽ പിത്തം ഉണ്ടാകാറില്ല. ഇത് അമിതമായി അടിഞ്ഞ് കൂടുന്ന കൊഴുപ്പിനെ നിയന്ത്രിക്കുകയും അമിത വണ്ണം ഉണ്ടാകുന്നത് തടയുകയും ചെയ്യും. മാത്രമല്ല, ശരീരത്തിന്റെ പ്രതിരോധശേഷി വർദ്ധിപ്പിക്കാൻ പപ്പായ മാത്രം മതി. കാലറി കുറവായതിനാൽ ശരീരഭാരം വർധിക്കുമെന്ന് പേടി വേണ്ട. പഴുത്തപപ്പായ അതിരാവിലെയോ രാത്രിയിലോ കഴിക്കാം.

ചർമ്മ സൗന്ദര്യത്തിന്

പപ്പായയിൽ അടങ്ങിയിരിക്കുന്ന വിറ്റാമിൻ A, വിറ്റാമിൻ C എന്നിവ ചർമ്മത്തെ ആരോഗ്യത്തോടെ സൂക്ഷിക്കാൻ സഹായിക്കും. ഇതിലടങ്ങിയിരിക്കുന്ന ആന്റിഓക്‌സിഡന്റുകൾ ചർമ്മത്തിൽ ഉണ്ടാകുന്ന ചുളിവുകൾ അകറ്റുകയും വാർധ്യക്യത്തിന്റെ ലക്ഷണങ്ങൾ അകറ്റുകയും ചെയ്യും.

പപ്പായ ഇലയുടെ ഗുണങ്ങൾ 

ഈ  ഇല നന്നായി ആവിയിൽ വേവിച്ച ശേഷം വിവിധ മൂത്രാശയരോഗങ്ങള്‍ക്കും മഞ്ഞപ്പിത്തത്തിനും മരുന്നായി ഉപയോഗിക്കാം. പപ്പായ ഇലയിൽ അടങ്ങിയിരിക്കുന്ന കാല്‍സ്യം, അയൺ, മഗ്നീഷ്യം, ഫൈറ്റോന്യൂട്രിയന്റുകൾ, വിറ്റാമിൻ A, C, E, K തുടങ്ങിയവ ആരോഗ്യത്തെ പരിപോഷിപ്പിക്കും. പപ്പായയുടെ ഇല ഉപയോഗിച്ച് ഉണ്ടാക്കുന്ന ചായ പെപ്റ്റിക് അൾസർ പ്രതിരോധിക്കാൻ ഫലപ്രദമാണ്. മാത്രമല്ല, ഇതിലടങ്ങിയിരിക്കുന്ന ആന്റിമൈക്രോബിയൽ, ആന്റിഇൻഫ്ലമേറ്ററി ഘടകങ്ങൾ വയറിലുണ്ടാകുന്ന ഇൻഫ്ലമേഷൻ കുറയ്ക്കാൻ സഹായിക്കും.

ക്യാൻസറിനെ പ്രതിരോധിക്കാൻ: 

പപ്പായ ഇലയുടെ സത്തിൽ അടങ്ങിയിരിക്കുന്ന അസെറ്റോ ജെനിൻ എന്ന സംയുക്തം ബ്രെസ്റ്റ് ക്യാൻസർ, ശ്വാസകോശാർബുദം, പാൻക്രിയാറ്റിക് ക്യാൻസർ തുടങ്ങിയ രോഗങ്ങൾ ഉണ്ടാകാനുള്ള സാധ്യത കുറയ്ക്കും. ഇലയിൽ ഉള്ള ആന്റി ഇൻഫ്ലമേറ്ററി സവിശേഷതകൾ കീമോതെറാപ്പി മൂലം ഉണ്ടാകുന്ന പാർശ്വഫലങ്ങളെ ലഘൂകരിക്കാനും സഹായിക്കും.

ക്രമമായ ആർത്തവത്തിന്: 

ആർത്തവ വേദന മാറ്റാൻ പപ്പായ ഇലയുടെ നീര് ഉത്തമമാണ്. കൂടാതെ ആർത്തവ സമയത്തും ആർത്തവം ആരംഭിക്കുന്നതിനു മുമ്പും ഉണ്ടാകുന്ന ശാരീരികാസ്വസ്ഥതകൾ കുറയ്ക്കാനും പപ്പായ ഇലയുടെ സത്ത് മതി. ആർത്തവ ചക്രം ക്രമമാക്കാനും ഈ സത്ത് വളരെ ഉപയോഗപ്രദമാണ്.

ഡെങ്കിപ്പനി തടയാൻ: 

മഴക്കാലത്ത് കൂടുതലായി കാണപ്പെടുന്ന ഡെങ്കിപ്പനിയെ പ്രതിരോധിക്കാൻ പപ്പായ ഇലയ്ക്കു കഴിയും. രക്തത്തിലെ പ്ലേറ്റ്‌ലെറ്റ് കൗണ്ട് കൂട്ടാൻ പപ്പായ ഇല സഹായിക്കും. എന്നാൽ ഇത് ഉപയോഗിക്കുമ്പോൾ ഒരു ആരോഗ്യ വിദഗ്ധന്റെ ഉപദേശം തേടിയ ശേഷം മാത്രം ഉപയോഗിക്കുക.

പപ്പായ ഇലയും പ്രമേഹവും

നല്ല പഴുത്ത പപ്പായയ്ക്ക് മധുരമുണ്ടെങ്കിലും പ്രമേഹരോഗികൾക്ക് കഴിക്കാമെന്നാണ് പറയുന്നത്. പഴുത്ത പപ്പായയിലെ ഗ്ളൈസമിക് ഇൻഡക്സ് നില മാധ്യമത്തിലായതിനാൽ പ്രേമേഹം പിടിപെട്ടവർക്ക് നിയന്ത്രിതമായ അളവിൽ പപ്പായ കഴിക്കാമത്രേ. എന്നാൽ പപ്പായ ഇലയ്ക്ക് പ്രമേഹത്തെ പ്രതിരോധിക്കാൻ കഴിവുണ്ടെന്നാണ് പഠനം. പപ്പായ ഇലയിൽ അടങ്ങിയിട്ടുള്ള ചില എൻസൈമുകൾ ശരീരത്തിൽ ഇൻസുലിന്റെ ഉത്പാദനത്തെ നിയന്ത്രിക്കുന്നത് മൂലം രക്തത്തിലെ പഞ്ചസാരയുടെ അളവും നിയന്ത്രിക്കപ്പെടുന്നു.

പപ്പായയുടെ വേര്

വേരിനുമുണ്ട് പല ആരോഗ്യ ഗുണങ്ങൾ. പപ്പായയുടെ വേര് ചതച്ച് പേസ്റ്റ് രൂപത്തിലാക്കിയ ശേഷം പല്ല് വേദന ഉള്ള ഭാഗത്ത് വെച്ചാൽ പല്ലു വേദനയ്ക്ക് ആശ്വാസം കിട്ടും.

പപ്പായയുടെ കുരു

ഹൃദയാരോഗ്യത്തെ സംരക്ഷിക്കാൻ പപ്പായയുടെ കുരുക്കൾക്ക് കഴിയും. മാത്രമല്ല, പപ്പായയുടെ കുരുവിൽ അടങ്ങിയിട്ടുള്ള ആന്റിബാക്ടീരിയൽ ഘടകങ്ങൾ വൃക്കയുടെ തകരാറുകൾ തടഞ്ഞ് പൂർണ്ണ ആരോഗ്യത്തോടെ സൂക്ഷിക്കുന്നതിനോടപ്പം കരളിൽ നിന്ന് വിഷാംശങ്ങൾ നീക്കുകയും ചെയ്യുന്നു.

മറ്റ് ഗുണങ്ങൾ

പപ്പായയില്‍ അടങ്ങിയിരുക്കുന്ന ലൈക്കോപീന്‍ എന്ന ഘടകം കൊളസ്‌ട്രോൾ ഉണ്ടാകുന്നത് തടയുകയും ഹൃദയത്തെ ആരോഗ്യത്തോടെ സൂക്ഷിക്കുകയും ചെയ്യും.

ശ്വാസകോശ സംബന്ധമായ രോഗങ്ങൾ തടയാൻ പപ്പായ സ്ഥിരമായി കഴിച്ചാൽ മതി.

നിത്യേന പപ്പായ ഭക്ഷണത്തിൽ ഉൾപ്പെടുത്തുന്നത് ശരീരത്തെ അണുബാധകളിൽ നിന്ന് സംരക്ഷിക്കും.

കാഴ്ചശക്തി വർധിപ്പിക്കുന്നതിനും പപ്പായ ഉത്തമമാണ്.

( കടപ്പാട് : വാട്സ് ആപ്പ് )